انت مصر
ملعون ابو الحرية ما دمت في حضنك
ملعون ابو الإرادة ما دمت انا طوعك
مخلص لك يا مصر بس أنا سمعك
أنا كل يوم اقوم افطر على خيرك
احب كل الناس اشرب مياه زيرك
....................................................
وجئت من رحمك ابنك البكري
اسمي انا محمد واسمعي ذكري
مهموم أنا بحبك وهو ده فكري
اسبح بحمد الله تسمعي شكري
.............................................
انا جسمي من نبتك وم نيلك
انا بشوفك زاهية ..يا حليلك
وبأغني واعشق انا.. ليلك
من صغيري باشوف قناديلك
امشي وراك أجرى انادي لك
وأنت روح الجسم ابقى انا..ديلك
...........................................
وطعم ترابك الأسود يغذيني
نسمة هواك بالكرب تعذيني
انت الجمال والعلم وأديني
وأديني اكتر عشان تدفيني
حبي لك الكون ما يكفيني
وانا لما اموت ما تكفنيني
عاوز أكون حجر ومديني
حطيني طوبة لصرح وابنيني
انفع كده العباد وابقى اسقيني
من ندى مطرك ابقي ارويني
انبت فروع وثمار وياسميني
وارفعي دعاء ربي ليهديني
انا نفسي اموت ماشي وهزيني
واصحى انا من تاني وعيديني
أنتِ حياتي وحبي ومكملة ديني
25 فبراير 2009
ليست هناك تعليقات:
إرسال تعليق